ସବୁ ସ୍ମାର୍ଟଫୋନରେ ‘ସଞ୍ଚାର ସାଥୀ ଆପ୍’ ରହିବା ବାଧ୍ୟତାମୂଳକ
ଭାରତରେ ମୋବାଇଲ୍ ସୁରକ୍ଷାକୁ ସୁଦୃଢ଼ କରିବା ଏବଂ ଅନଲାଇନ୍ ଠକେଇକୁ ରୋକିବା ପାଇଁ, ଦୂରସଂଚାର ବିଭାଗ (DoT) ଏକ ନୂତନ ନିର୍ଦ୍ଦେଶ ଜାରି କରିଛି। । ସରକାରଙ୍କ ଟେଲିଯୋଗାଯୋଗ ବିଭାଗ (DoT) ଭାରତରେ ବିକ୍ରି ହେଉଥିବା କିମ୍ବା ବାହାରୁ ଆସୁଥିବା ସମସ୍ତ ସ୍ମାର୍ଟଫୋନଗୁଡ଼ିକରେ ‘ସଞ୍ଚାର ସାଥୀ ଆପ୍’ (Sanchar Saathi) ପୂର୍ବରୁ ଇନଷ୍ଟଲ୍ ହେବାକୁ ବାଧ୍ୟତାମୂଳକ କରିଛନ୍ତି । ଏହି ଆପ୍କୁ ଫୋନରୁ ହଟାଯାଇପାରିବ ନାହିଁ । ସୋମବାର DoT ଏହି ନିର୍ଦ୍ଦେଶନାମାକୁ ସମସ୍ତ ମୋବାଇଲ କମ୍ପାନୀ (OEMs) ଏବଂ ଆମଦାନୀକାରୀଙ୍କୁ ଜାରି କରିଛି ।ସଞ୍ଚାର ସାଥୀ ଆପ୍ ମୋବାଇଲ୍ ବ୍ୟବହାରକାରୀଙ୍କୁ ସୁରକ୍ଷା ପ୍ରଦାନ କରେ। ଯଦି କୌଣସି ଫୋନ୍ ହଜିଯାଏ କିମ୍ବା ଚୋରି ହୋଇଯାଏ, ତେବେ କିଛି ମିନିଟ୍ ମଧ୍ୟରେ ରିପୋର୍ଟ କରିବା ଏବଂ ବ୍ଲକ୍ କରିବା ସମ୍ଭବ। ଏହା ମୋବାଇଲ୍ ଫୋନ୍ରେ ନକଲି ଲିଙ୍କ୍, ସ୍ପାମ୍ କଲ୍, ସନ୍ଦିଗ୍ଧ ମେସେଜ୍ ଏବଂ ଚାଲୁଥିବା ସଂଯୋଗ ଉପରେ ନଜର ରଖିବାରେ ମଧ୍ୟ ସାହାଯ୍ୟ କରେ। ଏହି ଆପ୍ର ବିଶେଷତ୍ୱ ହେଉଛି ଯେ ବ୍ୟବହାରକାରୀମାନଙ୍କୁ ଆଉ IMEI ନମ୍ବର ମନେ ରଖିବାର ଅସୁବିଧାର ସମ୍ମୁଖୀନ ହେବାକୁ ପଡ଼ିବ ନାହିଁ।ସରକାରଙ୍କ ଏହି ନିୟମ Apple, Samsung, Xiaomi, Oppo ଓ Vivo ପରି ସମସ୍ତ ବଡ଼ କମ୍ପାନୀର ସ୍ମାର୍ଟଫୋନ ଉପରେ ଲାଗୁ କରାଯାଇଛି । ନିର୍ଦ୍ଦେଶନାମାରେ କୁହାଯାଇଛି ଯେ ଫୋନ ସେଟ୍ କରିବା ସମୟରେ ୟୁଜରଙ୍କୁ ସଞ୍ଚାର ସାଥୀ ଆପ୍ ସ୍ପଷ୍ଟ ଭାବେ ଦିଶିବା ଆବଶ୍ୟକ ଏବଂ ସେମାନେ ଏହାକୁ ସହଜରେ ଖୋଲିପାରୁଥିବା ଦରକାର । ଏହାସହିତ ଆପ୍ର କୌଣସି ସୁବିଧା ବନ୍ଦ କିମ୍ବା ସୀମିତ ରଖାଯାଇପାରିବ ନାହିଁ, ଫଳରେ ୟୁଜର ଏହାର ସମ୍ପୂର୍ଣ୍ଣ ଲାଭ ଉଠାଇପାରିବେ ।
