ମୁଣ୍ଡ ପିଟି ପିଟି କାନ୍ଦୁଛି ସ୍ତ୍ରୀ।ମଝି ରାସ୍ତାରେ ସ୍ବାମୀର ଶବକୁ ଜଗି ବସିଛି ସ୍ତ୍ରୀ
ମୁଣ୍ଡ ପିଟି ପିଟି କାନ୍ଦୁଛି ସ୍ତ୍ରୀ। ମଝି ରାସ୍ତାରେ ସ୍ବାମୀର ଶବକୁ ଜଗି ବସିଛି।ଏମିତି କିଛି ଦେଖିବାକୁ ମିଳିଥିଲା କେନ୍ଦ୍ରାପଡା ଜିଲ୍ଲା ଚଣ୍ଡୀଖୋଲ-ପାରାଦ୍ୱୀପ ୫୩ ନଂ ଜାତୀୟ ରାଜପଥର ଦୁହୁରିଆ ଛକରେ।ସୂଚନା ମୁତାବକ ମହିଳା ଜଣକ ହେଉଛନ୍ତି ଦୂଲାରୀ ମାରଢି। ରବିବାର ସିଏ ଓ ତାଙ୍କ ସ୍ୱାମୀ କାମ କରିବା ପାଇଁ ବାଲେଶ୍ବରୁ କେନ୍ଦ୍ରାପଡ଼ା ଆସିଥିଲେ। ଆଉ ଗୁରୁବାର ଦିନ ବସଯୋଗେ ଘରକୁ ଫେରୁଥିଲେ। ହେଲେ ଦୁହୁରିଆ ଛକ ପାଖରେ ହଠାତ ତାଙ୍କ ସ୍ୱାମୀଙ୍କୁ ହୃଦଘାତ ହୋଇଥିଲା। ହେଲେ ସେ ସମୟରେ ସାହାଯ୍ୟ କରିବେ କଣ ଉଭୟଙ୍କୁ ବସରୁ ତଳକୁ ଓହ୍ଲାଇଦେଇ ଛାଡ଼ି ପଳାଇଥିଲେ ବସ କର୍ମଚାରୀ। ରାସ୍ତା କଡ଼ରେ ସ୍ବାମୀ ମୃତଦେହ ପାଖେ ସ୍ତ୍ରୀ କାନ୍ଦୁଥିବା ଲୋକ ଦେଖିବା ପରେ ପୂରା ଘଟଣା ସାମନାକୁ ଆସିଥିଲା। ପାଖରେ ଅର୍ଥ ନ ଥିବାରୁ ସ୍ବାମୀଙ୍କ ମୃତଦେହକୁ ହସ୍ପିଟାଲ୍ ଯାଏଁ ନେବା ବି ସ୍ତ୍ରୀଙ୍କ ପକ୍ଷେ ସମ୍ଭବପର ହୋଇନଥିଲା। ଶେଷରେ ବଜାର କମିଟି ସଦସ୍ୟ ଏଥିରେ ହସ୍ତକ୍ଷେପ କରିଥିଲେ। ୨ହଜାର ଟଙ୍କା ଯୋଗାଡ଼ କରିବା ପରେ ଆମ୍ବୁଲାନ୍ସ ଡକାଇଥିଲେ। ସେହି ଆମ୍ବୁଲାନ୍ସରେ ମୃତଦେହ ସହିତ ପତ୍ନୀଙ୍କୁ ଜିଲ୍ଲା ହସ୍ପିଟାଲ୍କୁ ପଠାଯାଇଥିଲା।ତେବେ ଜିଲ୍ଲା ମୁଖ୍ୟ ଚିକିତ୍ସାଳୟରେ ଡାକ୍ତର ଦୁଲାରୀଙ୍କ ସ୍ୱାମୀଙ୍କୁ ମୃତ ଘୋଷଣା କରିଥିଲେ। ହେଲେ ଅର୍ଥାଭାବ କାରଣରୁ ମୃତଦେହକୁ ବାରିପଦାକୁ ଫେରାଇ ନେବାକୁ ଅସମର୍ଥ ଥିଲେ ଦୁଲାରୀ। ତେବେ ଏନେଇ ତାଙ୍କୁ ସାହାଯ୍ୟ କରିଥିଲେ ଉପସ୍ଥିତ ଗଣମାଧ୍ୟମ ପ୍ରତିନିଧି। ସେମାନେ କେନ୍ଦ୍ରାପଡା ଜିଲ୍ଲାପାଳଙ୍କ ଦୃଷ୍ଟି ଆକର୍ଷଣ କରିଥିଲେ। ପରେ ଜିଲ୍ଲାପାଳଙ୍କ ନିର୍ଦ୍ଦେଶକ୍ରମେ ଏକ ମହାପ୍ରଣାୟନ ଗାଡ଼ିର ବ୍ୟବସ୍ଥା କରାଯାଇଥିଲା। ଯେଉଁଥିରେ ଦୁଲାରୀ ନିଜ ସ୍ୱାମୀଙ୍କ ମୃତଦେହକୁ ନେଇ ବାରିପଦା ଯାଇଥିଲେ। ଏହାସହ ଜିଲ୍ଲା ପ୍ରଶାସନ ତରଫରୁ ଶବ ଶତ୍କାର ପାଇଁ ତାଙ୍କୁ ୧୦ ହଜାର ଟଙ୍କାର ଆର୍ଥିକ ସହାୟତା ଦିଆଯାଇଥିଲା ।
