ମହାକାଳପଡ଼ା ତହସିଲଦାରଙ୍କ ୭ଟି ପ୍ଲଟ୍ ସହ ଲକ୍ଷାଧିକ ଟଙ୍କା ଠାବ
୨୦ ହଜାର ଟଙ୍କା ଲାଞ୍ଚ ନେଉଥିବା ବେଳେ ଭିଜିଲାନ୍ସ ହାତରେ ଧରା ପଡ଼ିଥିଲେ କେନ୍ଦ୍ରାପଡା ଜିଲ୍ଲା ମହାକାଳପଡ଼ା ତହସିଲଦାର । ଏକ ସରକାରୀ ଜମିରୁ ଜବରଦଖଲ ଉଚ୍ଛେଦ ଅର୍ଡର କରିବା ପାଇଁ ତହସିଲଦାର ଶିବପ୍ରସାଦ ମଲ୍ଲିକ ଏହି ଟଙ୍କା ନେଉଥିଲେ l ଏହି ସମୟରେ ଭିଜିଲାନ୍ସ ଟିମ୍ ଅତର୍କିତ ଚଢାଉ କରିଥିଲା । ଯାହା ପରେ ତାଙ୍କର ୬ଟି ଠିକଣାରେ ଏକକାଳୀନ ଚଢାଉ କରିଥିଲା ଭିଜିଲାନ୍ସ ଟିମ୍ । ୭ ଲକ୍ଷ ଟଙ୍କା ମୂଲ୍ୟର ଘରୋଇ ସାମଗ୍ରୀ, ୧.୫୪ ଲକ୍ଷ ଟଙ୍କା ନଗଦ ଏବଂ ୪ଟି ଦୁଇ ଚକିଆ ଯାନ ମଧ୍ୟ ଜବତ କରାଯାଇଛି।
କେନ୍ଦ୍ରାପଡା ଜିଲ୍ଲାରେ ତାଙ୍କର ସମ୍ପତ୍ତି ମଧ୍ୟରେ ୩ ମହଲା ବିଶିଷ୍ଟ ମାର୍କେଟ୍ କମ୍ପ୍ଲେକ୍ସ ଯେଉଁଥିରେ ୩ ବଡ଼ ହଲ୍ ଏବଂ ୩ ଦୋକାନ ରହିଛି। ଯାହା ୨୦୨୪ ମସିହାରେ ଭାଗବତପୁରରେ ନିର୍ମିତ ହୋଇଥିଲା। ୨୭୦୦ ବର୍ଗଫୁଟ କ୍ଷେତ୍ରଫୁଟରୁ ଅଧିକ ଏକ ଦୁଇ ମହଲାର ଏକ କୋଠା ୨୦୨୪-୨୫ ମସିହାରେ ଗଣେଶପୁରରେ ନିର୍ମିତ ହୋଇଥିଲା ଏବଂ ଡେରାବିସର ବାଘିଲୋବାବାନପୁରରେ ୨୦୧୮-୨୦୧୯ ମସିହାରେ ୪,୬୦୦ ବର୍ଗଫୁଟ କ୍ଷେତ୍ରଫୁଟରୁ ଅଧିକ ଆଉ ଏକ ଦୁଇ ମହଲା କୋଠା ରହିଛି।ତାଙ୍କ ମାଲିକାନାରେ ଥିବା ସମସ୍ତ ସାତଟି ପ୍ଲଟ୍ କେନ୍ଦ୍ରାପଡା ସହର ଉପକଣ୍ଠରେ ଅବସ୍ଥିତ।ତାଙ୍କୁ ଭିଜିଲାନ୍ସ ଟିମ୍ ମଙ୍ଗଳବାର ଗିରଫ କରିଥିବା ବେଳେ ବୁଧବାର ତାଙ୍କୁ କୋର୍ଟ ଚାଲାଣ କରାଯିବ ।
