ଅଯୋଧ୍ୟା ରାମ ମନ୍ଦିରରୁ ଚାନ୍ଦା ଚୋରି ମାମଲା, ତୁରନ୍ତ ଶୁଣାଣି ପାଇଁ ମନା କଲେ ସୁପ୍ରିମକୋର୍ଟ

ଉତ୍ତରପ୍ରଦେଶ ଅଯୋଧ୍ୟା ରାମ ମନ୍ଦିର ଦାନରାଶି ଚୋରି ମାମଲାକୁ ନେଇ ସୁପ୍ରିମକୋର୍ଟ ବଡ଼ ରାୟ । ସୁପ୍ରିମକୋର୍ଟ ଏହି ମାମଲାରେ ତୁରନ୍ତ ଶୁଣାଣି କରିବାକୁ ମନା କରିଦେଇଛନ୍ତି । କାହିଁକି ତୁରନ୍ତ ଶୁଣାଣି ଚାହୁଁଛନ୍ତି ବୋଲି ଯାଚିକା ଆବେଦନକାରୀଙ୍କୁ ଓଲଟା ପ୍ରଶ୍ନ କଲେ ସର୍ବୋଚ୍ଚ ଅଦାଲତ। ଛୁଟି ସରିବା ପରେ କୋର୍ଟ ଏହି ମାମଲାକୁ ତାଲିକାଭୁକ୍ତ କରିବେ ବୋଲି କହିଛନ୍ତି। ଜଷ୍ଟିସ୍ ଏମ.ଏମ ସୁନ୍ଦରଶ ଏବଂ ଜଷ୍ଟିସ୍ ଶିଲ ନାଗୁଙ୍କ ପୀଠ ସମ୍ମୁଖରେ, ଆବେଦନକାରୀ ରାମ ମନ୍ଦିର ଚାନ୍ଦା ଚୋରି ଘଟଣାର ତଦନ୍ତ ପାଇଁ SIT ଗଠନ ଉପରେ ତୁରନ୍ତ ଶୁଣାଣି କରିବାକୁ ଆବେଦନ କରିଥିଲେ। ଏହା ଏକ ସଙ୍ଗୀନ ଅଭିଯୋଗ ହୋଇଥିବା ବେଳେ ରାଜ୍ୟ ସରକାରଙ୍କ ମାମଲା ପରିଚାଳନା ନେଇ ସନ୍ଦେହ ସୃଷ୍ଟି କରିଥିଲେ। ଆବେଦନକାରୀ ସୁପ୍ରିମକୋର୍ଟଙ୍କୁ କେନ୍ଦ୍ର ସରକାର, ଉତ୍ତର ପ୍ରଦେଶ ସରକାର ଏବଂ ଶ୍ରୀରାମ ଜନ୍ମଭୂମି ତୀର୍ଥ କ୍ଷେତ୍ର ଟ୍ରଷ୍ଟକୁ ଜନସ୍ୱାର୍ଥର ସୁରକ୍ଷା ପାଇଁ ପ୍ରଭାବଶାଳୀ ତଦାରଖ, ଅଡିଟ୍ ଏବଂ ତଦାରଖ ବ୍ୟବସ୍ଥା କାର୍ଯ୍ୟକାରୀ କରିବାକୁ ନିର୍ଦ୍ଦେଶ ଦେବାକୁ ଅନୁରୋଧ କରିଥିଲେ। ହେଲେ ଛୁଟି ସରିବା ପରେ ଏହି ମାମଲାକୁ ତାଲିକାଭୁକ୍ତ କରାଯିବ ବୋଲି କୋର୍ଟ ସଫା ସଫା କହିଛନ୍ତି। ଜୁଲାଇ ୧୨ ତାରିଖ ପରେ ପରବର୍ତ୍ତୀ ଶୁଣାଣି ହେବ ବୋଲି ଅନୁମାନ କରାଯାଉଛି। ସେପଟେ ଅଯୋଧ୍ୟା ରାମ ମନ୍ଦିରରେ ଦାନରାଶି ଚୋରି ମାମଲାରେ ଚମ୍ପତ ରାୟ ଏବଂ ଅନିଲ ମିଶ୍ରା ଇସ୍ତଫା ଦେଇଛନ୍ତି । ଇସ୍ତଫା ଦେବା ପରେ ଏମାନଙ୍କୁ ପଚରାଉଚରା କରିବା ପାଇଁ ୧୪୦ ଲୋକଙ୍କ ବୟାନ ନିଆଯିବ । ଚମ୍ପତ ରାୟ ଏବଂ ଅନିଲ ମିଶ୍ରାଙ୍କ ଷ୍ଟେଟମେଣ୍ଟ ନିଆଯିବ ।